WEVOTE / SERVICE & SUPPORT
服務、付款及私隱說明
結帳前，先了解活動額度點用、付款點處理，以及有需要時點聯絡我哋。
更新日期：
一次付款，再開一場。
另購 1 個活動額度，可建立 1 個投票活動。呢個係一次性購買，唔係月費訂閱。
- 可建立
- 1 個活動
- 最多記錄
- 10,000 張有效票
- 投票期間
- 7 日以內
儲存草稿已經使用 1 個額度。投票期間由開始時間計至截止時間；多選投票仍然每次成功提交計 1 張選票。活動包含分享連結、QR code、結果圖表及匯出功能，按活動設定同權限提供。
免費試用：每個公開登記帳戶一生可建立 1 個活動，草稿亦計，最多 10,000 張有效票，投票期間最長 24 小時。另購額度唔會重置免費配額。
以結帳前顯示嘅方案同金額為準。
最新價格、貨幣及可購買方案會喺管理頁顯示，再喺 Stripe 結帳頁確認。正式付款會收取真實款項；標示「測試模式」嘅結帳只供獲授權測試帳戶，測試額度同正式額度分開。
信用卡資料直接喺 Stripe 嘅安全結帳頁輸入，由 Stripe 處理付款。WeVote 程式唔會收集或保存完整卡號及信用卡安全碼。
伺服器核實付款後，額度會加入原本購買嘅主辦方帳戶。返回 WeVote 唔代表已付款；未見額度時，請先按「檢查付款及額度」，或聯絡支援核對，避免重複付款。
有付款或服務問題，先聯絡我哋。
未付款時可以離開 Stripe 結帳頁。取消返回唔會新增額度；未完成嘅結帳可由管理頁繼續。
如已付款並希望取消購買或申請退款，請電郵 octopus.infotech.hk@gmail.com，提供訂單編號或付款收據、帳戶顯示名稱，同申請原因。我哋會核對付款、額度有冇使用及實際服務情況，再跟進處理；提交申請唔代表退款已獲批准。
退款獲確認後會經原付款渠道處理，實際入帳時間視乎 Stripe 同銀行。退款會影響相關未使用額度；如已建立活動，請一併提供活動編號，方便核對。請勿以電郵傳送卡號、安全碼、登入密鑰或密碼。
為登入、記票同核對付款保存必要記錄。
- 主辦方：保存登入服務類別、該服務提供嘅帳戶識別、顯示名稱、角色、活動及配額記錄。WeVote 唔會收集 Google／Apple 密碼，亦唔會保存其 access token 或 refresh token。
- 投票：保存瀏覽器／票據識別嘅雜湊、已選選項同提交時間。公開結果按活動設定顯示彙總；獲授權管理者可匯出含雜湊識別同時間嘅逐票資料。
- 付款：保存訂單、Stripe 付款識別、方案、金額、貨幣、付款狀態及額度記錄，用作核對付款同避免重複入帳。Stripe 另行處理結帳時提交嘅資料。
- 瀏覽器：使用必要 cookie 維持登入同活動投票識別；亦會保存暫存重試請求、投票狀態同導覽偏好。登入 session 最長 8 小時，用完請登出。
網站由 Cloudflare 提供寄存及安全驗證，會涉及連線同驗證資料；登入限流亦會使用 IP 地址嘅雜湊。可用嘅 Google／Apple 登入同 Stripe 付款，各自由相關服務處理資料。
活動截止唔會自動刪除帳戶、活動、選票或付款記錄。如需查閱、更正或刪除相關資料，請聯絡支援，我哋會先核對帳戶及記錄，再說明可處理方式。已公開或匯出嘅副本可能仍由主辦方或其他人保存。
適合活動互動同意見收集。
公開投票用瀏覽器識別配合安全驗證減少重複提交，唔需要投票者登入。清除瀏覽器資料、用無痕模式或轉裝置仍可能再次投票，呢個方式唔能夠核實「一個自然人一票」。
有效票數係系統已接受嘅選票數；多選選項嘅比例可能加埋超過 100%。活動截止前票數會更新，截止後先係最終結果。大型活動嘅實際容量要按使用情況驗證，方案票數上限唔等於同時使用人數保證。
WeVote · DAA.HK
帳戶、活動、付款、退款查詢及資料處理問題，可透過以下電郵聯絡：
octopus.infotech.hk@gmail.com如問題涉及某場活動嘅題目、參與資格或結果用途，請同時向該活動主辦方查詢。